Steun de Vastelaovend! Kaup ein lot!

De gemeinte haet vergunning verliénd, sponsors hebbe moeïe priéze toegezag en d’n drökker haet 999 loéte gedrök. We meuge weer op paad um ôs lötjes aan de man en vrouw te bringe. De opbrings kump hielemaol ten goede aan de Groët-Venlose Vastelaovend.

De loéte koste € 3,- per stök. ’t Schient det auk dit jaor weer de spesjale aksie… 3 veur ein tientje! aangebaoje wuurt.

Weej winse alle kaupers alves vuul gelök. Zaoterdaag 3 maart 2019 make we de oétslaag bekind.

Intern aafscheid neme Nar Levi I

De zaoterdaag veur de 11e van de 11e wuurt d’r tradisiegetrouw intern aafscheid genaome van de Groët Venloosche Nar. In 2018 is det d’n hiër Levi Spaaij. Hae woort zaoterdaag 3 fibberwarie onder groëte belangstelling geproklameerd door Ron Dings, frontman van dialectband Van Gelder.

Vanaaf det moment ging Levi Groët-Venlo door en leet hae zich in idder stadsdeil zeen. ’t Waas ‘nne fantastische tiéd. En hoewel dao nog inkele bezeuke gepland staon, neeme weej intern toch al aafscheid van ôzze hoégheid 2018.

De baove verdeeping (alde woénkamer Lenie) is weer de feeslokasie. Onder ’t genot van ein hepke en drengske wuurt d’r same truukgekeke. Tiédes deese aovend wuurt Nar Levi I opgenaome in de Sociëteit Ald Narre.

Bin d’r beej! Aaftrap De 3-kes radio

Leefhebbers van Groët-Venlose Vastelaovesmeziék kinne weer geneete van De 3-kes Radio. ’t Joeksstation is vanaaf 4 november tot Aswoensdaag non-stop te beluustere.

Tradisiegetrouw trappe weej ’t nieje seizoen aaf beej Kefee de Baek zondaags veur 11-11. Deze kier is det 4 november. De bis vanaaf 15.03 oor welkom um mei plezeer te make, nao artieste te luustere en plaetjes aan te vraoge. De oétzending däört wies ongevier 19.03 oor.

De 3-kes radio is te beluustere via www.de3kesradio.nl en via de app (mei meugelik gemak door AppComm). De 3-kes radio besteit vanaaf 2009. Vanaaf 2013 vindt d’n Aaftrap plaats beej de Baek.