Op zaoterdaag 18 jannewarie zien weej te vinde beej Jumbo Benders in Bliërick! Heej make weej de ganse daag live-radio.
Tiédes deese daag vraoge weej dich um de vouchers, die se ontvangs beej elke € 10 aan baodschappe, aan ôs vereiniging te schinke. Dich luusters toch auk nao De 3-kes radio?
Laeve de 3! Laeve de Vastelaovend! Laeve de clubkas!
De 3-kes reik dit jaor veur de zestiende kier ‘t 3-ke oét. Dé priés veur ‘t dreejtal det zich op de meis ludieke meniér in de Bliërickse optoch wet te prissentere. Inschriéve veur deilname kin tiédes de inschriéfavonde (28-1 & 4-2) van de Wortelepin. De priés wuurd uitgereik tiédes de reguliere priésoétreiking van de optoch.
Kreativiteit, originaliteit en aktualiteit speule een groéte rol beej deese optochpriés. Wilse kans make um ‘t 3-ke te winne dan zal se aan dees veurwaerde môtte voldoon. De raeje um deese priés, ‘nne wisseltrofee, toe te voege aan de sterrehemel van priézekategorieje is ‘t stimulere van dreejtalle in de Bliërickse optoch. De 3-kes is bliej det de priés erkind wuurd door de organisator van de Bliërickse optoch.
De sjurering is in hand van ein vakkundig komité det is samegesteld door De 3-kes. Nao de optoch zal tiédes de reguliere priésoétreiking in ‘t Raodhoes de priéswinnaer bekind waere gemak. De optoch trek zondaag 23 fibberwarie door de centrumstraote van Bliërick.
Um ‘t 3-ke daadwerkelik te kinne winne môtte vastelaovesvierders zich inschriéve veur de optoch. Dit kin tiédes de offisjele inschriéfaovonde van vastelaovesgezelschap ‘De Wortelepin’. Dees waere gehalde op de dinsdaagaovende 28 jannewarie en 4 fibberwarie van 20.00 tot 22.00 oor kinse terech beej kefee Apollo, Maasbreesestraot in Bliërick.
| jaor | naam | motto |
| 2005 | De Dreej-Kus-Jus | De Dreej-Kus-Jus |
| 2006 | Klatergold | De schatjes van Toetanchamon |
| 2007 | De herte deefkes | Zeet geej die vlinders in d’n boëk, kós det maar iëuwig deure |
| 2008 | De herte deefkes | Hollands next top model, oët Bliërick. As det ens waor waas |
| 2009 | Klatergold | Weej gaon as nar door d’n optoch |
| 2010 | Klatergold | Zoë doon weej det heej, neet ’t hofbal maar nao ’t swaree |
| 2011 | De Lionsklup | Loupend buffet |
| 2012 | De Lionsklup | Weej zitte florizant |
| 2013 | De Lionsklup | Weej zien blauw gebaore |
| 2014 | V.G. De Knoevelaers | Bliërickse shorttrekploog van 2018! |
| 2015 | Bliërickse Raods Vrouwluuj | Weej komme neet aan d’n bak. |
| 2016 | Dreej ald prinse oët de Bookend | Weej kinne as 3-kes toet 3 telle |
| 2017 | V.G. De Knoevelaers | Heej is ’t te doon! Bliërick first, Venlo second. |
| 2018 | De Lionsklup | Weej zette alles op de kop (Pottekieken) |
| 2019 | V.G. De Knoevelaers | Ein pondje minder |
| 2020 | ??? | ??? |
De 3 genomineerde die kans make op de ‘Groët Venlose Vastelaoves Injeksie’ zien bekind. In november hebbe zich 7 organisasies gemeld. Oét alle inzendinge haet ’t Comité van Aanbevaeling van De 3-kes 3 initiatieve gekaoze.
Op ôzze facebookpagina kinse tot en met 9 jannewarie stumme op de kandidate. Dit kin door ein of mierdere berichte te like-Ke. De inzender dae de meiste likes op zien berich haet. Op zondaag 12 jannewarie wuurt tiédes De 3-kes Narre-Zitting de cheque oétgereik aan de winnaer van de € 333,33.
De Thietuite: Nieje mantels jeugtrio
Jeugdclub Don Bosco: DJ inheure jeugbal
De Wortelepin: Wortelepinnie-kostuum jeugkemissie
Mit ’t bedraag van maximaol 333,33 euro ondersteune weej jaorliks éín good Vastelaovesinitiatief in de gemeinte Venlo. Jaorliks kinne persoéne, vereniginge, clubkes en organisasies zich kandidaat stelle um ’t bedraag toegeweze te kriege.