De derde thoésnar luustert nao de naam Willy Billekens. De 41-jarige Bliërickenaer is aktief as vastelaoveszenger beej Jocus en de Wortelepin. De kômmende dreej daag zweijt hae as Willy I de scepter euver alle Groët-Venlonaere.
’t Is genne onbekinde naam in de vastelaoveswaereld, Willy Billekens. In 2003 makte hae beej de liedjesmatinee van de Wortelepin zien debuut as zenger. Mier dan ens veel hae in de priéze. Hoégheid waere waas um tot noow toe nog neet gelök. Op ’t verrassingsbezeuk van De 3-kes woort spontaan gereageerd. Sinds vriédaagaovend meug Willy zich ‘Groët Venloosche Thoés Nar’ neume. Via ein live-verbinding waas de bekindmaking wederum via facebook te volge.
Willy Billekens is al 25 jaor same mit zien vrouw Sandra. Eur kinder Giel en Sil kriege de vastelaovend mit de paplaepel ingegaeve en waere meigenaome nao allerlei evenemente en aktiviteite. Jaorliks waere d’r veur ’t hiele gezin nieje outfits gemak. De oétverkeezing van Willy is veur De 3-kes ziér logisch. “’t Is ein persoén dae altiéd gooje zin liek te hebbe en vaak eine lach op ’t gezich haet, ziér betrokke is beej de dolle daag en dit auk op ein positieve meniér oétdruúg. Weej zien bliej um te meuge proclamere tot 3e thoésnar”, vertelt veurzitter Rob Jacobs.
De Nar is al ruum 20 jaor werkzaam beej de Albert Heijn in Bliërick. Naeve zinge duit Willy aan wielrenne en hardlaupe. Leefhebber is hae van ’t spelke voetbal. Op zondaag as grensrechter beej FCV ’t Ven, as elder beej HBSV en as tillevisiekieker beej de eredivisie en Champions league. Veur de gezelligheid is hae lid van ein kaokclub en kaartclub. Biezonder detail is det Willy al zien hiele laeve aan de Baoldersestraot in Bliërick woént. Toen hae ’t elderlik hoés verleet koch hae in dezelfde straot ein woéning.
Willy Billekens krieg ein dreejdaagsprogramma aangebaoje. Via de kanale van De 3-kes is zien Narreschap te volge. Thoésnar Willy I mak kômmende zondaag zien môtto en proklamasie bekind.