De 3 genomineerde die kans make op de ‘Groët Venlose Vastelaoves Injeksie’ zien bekind. In november 2021 hebbe organisasies zich mit ein initiatief kinne melde. Oét alle inzendinge haet ’t bestuur van De 3-kes 3 initiatieve gekaoze.
Op ôzze facebookpagina kinse van 1 tot en met 9 jannewarie stumme op de kandidate. Dit kin door ein of mierdere berichte te like-Ke. De inzender dae de meiste likes op zien berich haet, wint ‘t geldbedraag. De cheque wuurt op ein nader te bepaole moment in fibberwarie oétgereik.
De genomineerde
- De Päörtjes (Venlo): Teambuildingsactiviteite jeugaafdeiling
Vastelaovesvereiniging Boëte de Paort haet jaore geleeje de jeugaafdeiling de Päörtjes opgezatte. De jeugkemissie organiseert sindsdien de jeugvastelaovend in Venlo-Zuid. D’r is ein entoesiaste club van jeugleeje die same ’t jeuggezelschap vorme. In deese gekke tiéd is ’t belangriék um de club beej mekaar te halde. We wille gaer daorum auk boéte de vastelaovend beej mekaar kômme. Dink aan ein bezeuk aan ein pretpark beejveurbeeld um de teambuilding good te halde. - De Kaetelaers (Steyl): Oprichting Kaetelkidzz
De Kaetelaers start mit ’t initiatief Kaetelkidzz. Op dees manier wille zeej kinder van 0-14 jaor op ’n speulse manier in aanraking laote kômme mit Vv De Kaetelaers. Op dees manier probere zeej kinder op jonge laeftiéd in aanraking te laote kômme mit ’t cultuurgood vastelaovend en in ’t biezonder de Kaetelaers. D’r waere jaorliks 3 aktiviteite georganiseerd en inkele gadgets oétgereik. De 3-kes zoel ein gooje injeksie kinne doon aan dit initiatief. - SPAN (Bliërick): Organisasie van treffe Groët-Bliërickse jeughoéghede
In Bliërick besteit sinds 2019 ‘SPAN, Groët-Bliërickse jeughoéghede’. Ein gratis toegankelik vastelaovesevenement op de vriédaag veur vastelaovend. Jeughoéghede kriege de kans de vastelaovescatwalk te betraeje. ’n Aantal vastelaovesgekke organisere ’t evenement en sprokkele jaorliks ’t geld beejmekaar. Um ’t event gratis te halde is de 333,33 euro van De 3-kes ziér welkom.
Groët Venloosche Vastelaoves Injeksie
Mit ’t bedraag van 333,33 euro ondersteune weej jaorliks ein good Vastelaovesinitiatief in de gemeinte Venlo. Jaorliks kinne persoéne, vereniginge, clubkes en organisasies zich kandidaat stelle um ’t bedraag toegeweze te kriege.