Sander Mattheijssen keuninklik onderscheide

Mit gepaste trots felicitere weej ózze ald-veurzitter, mede-oprichter en nog altiëd ziér aktief lid van De 3-kes, Sander Mattheijssen, mit zien Keuninklikke onderscheiding.

Vanmorge waort hae tillefonisch verras door ózze börgervader, dae vertelde det ’t Zijne Majesteit de Koning haet behaag um Sander te beneume tot Lid in de Orde van Oranje-Nassau. Uiteraard veur al zien verdeenste veur De 3-kes, maar auk de Vastelaovend in algemeine zin, en nog tal van organisasies wao hae al mier as 7×3 jaor as vreejwilliger aan verbonde is, waoronder Umroop Venlo. Sander is heejmei de jongst gedecoreerde van de Gemeinte Venlo. Laes via de link ’t niejsberich.

Sander zal morge op ’t Stadhoés zien lintje in ontvangs meuge neme. Geej kint Sander persuunlik of via ós digitale kanale felicitere mit dees unieke onderscheiding.

Vastelaovesleefhebber Jan Sijbers euverleeje

Vandaag, 19 november 2019, haet ôs ’t dreuvige niejs bereik det Jan Sijbers (‘nne Steylerse Bliërickse) is euverleeje. De gemeinschap verluus heejmei ‘nne geweldige mins mit ’n groët hert veur de Vastelaovend.

Jan haet zich tientalle-jaore ingezatte veur de laevendigheid van de gemeinschap. Deese mins had altiéd tiéd veur ein präötje en dök gooje zin. Toen De 3-kes in de beginfase zoot waas Jan auk ein van de iërste minse dae ôs ondersteunde. Hae vond ’t geweldig det weej as jonge klub aktief ware. Hae woort vanaaf ’t begin lid van de Club van 50 en is det blieve doon wies ’t lets. Doornaeve meuge weej al sinds 2006 op de vriédaag veur Vastelaovend gebakke vis kômme aete aan de kraom ‘beej Sijbers’.

Dankzij Jan verkaupe weej auk al jaore ôs loéte van € 3,-, veur 3 veur ein tientje. Det waas typisch Jan um zo’n vondste te bedinke.

Deese man zoot noeïts verlaege um ein präötje en kwaam se nog altiéd taege op vuul vastelaovesevenemente. In 2017 kreeg hae veur al zien inzet van De Wortelepin de onderscheiding ‘Meister in de Orde van ’t Bliërickse hert’. Weej zulle Jan Sijbers noeïts vergaete en winse zien femilie hiel vuul sterkte um dit groëte verlees te drage.

Names alle leeje,

Rob Jacobs
veurzitter g.v.v.g. De 3-kes

Foto: Jan mit 3 vingers in de luch. Hae had ein ongeluiflik werm hert veur De 3-kes

Aanmelde veur d’n optoch 2020

Op zaoterdaag 15 fibberwarie 2020, ein waek veur de Vastelaovend, trek ózze optoch weer door de binnestad van Venlo. Gezelschappe mit hoéghede, joekskapelle, gruupkes en faatse kinne meidoon as zeej wille. Umdet weej det gaer van te veure wille weite, vraoge weej dich aan te melde.

We verzamele rond 11.00 oor beej kefee de Baek. Um 11.45 oor wuurt in optoch nao ’t Stadhoés getrokke. Op de mert wuurt de Groët-Venloosche Nar 2020 oétgeroope.

Meidoon aan d’n optoch?

Optochdeilnemers deene zich te halde aan ’t optochreglement. De kins dich aanmelde via info@de3kes.nl.

Live oétzending

Net wie de veurige dreej jaor wuurt d’r ein live-oétzending gemak rondum de optoch en ’t oétroope. Dees wuurt oétgezonde via ózze facebookpagina. De oétzending begint um 12.30 oor. Bekiek heej de oétzending van 2019.