Iddere 3e zaoterdaag van de maond zette weej wies aan Vastelaovend 2022 eine echte VastelaovesVreejwilliger in ’t zunke. Wae zien die stille krachte op de achtergrond? De achste VV-er Anja Westheim-Jacobs, gebaore en getaoge in d’n Bookend.
1. Waat duis dich um de vastelaovend laevendig te halde?
Mien elders hebbe mien broor en mich altiéd mei op paad genaome. Van kleins aaf aan vier ik dus al vastelaovend. Mien elders stonde beej ’t kefee Mie van Rutte achter d’n tap en weej rende as kinder dan door de kroeg. Nog altiéd viere weej vastelaovend in d’n Bookend. We laote ôs aevel auk zeen in Bliërick tiédes de Groëte optoch mit ôs jeugclub Don Bosco en de Worteleschrabbers. Netuurlik is ôzze jeughoégheid dan auk altiéd van de partie.
Veur de jeughoégheid meug ik al jaore de proklamasie opmake. Op de liégere schoél heb ik mich zelf liere kalligrafere, oftewaal schoënschriéve. Miene meister Mark Hinssen schreef toendertiéd in de poëzie-albums in kalligrafie. Det vond ik zoé sjiék, det ik det zelf auk woel kinne. In 1996 kreeg ik de vraog of ik de proklamasie van jeugprins Bart woel schriéve. Det ging zoé good det ik det nog altiéd meug doon.
’t Blief ein biezonder spel um al van te veure te weite wae de nieje jeughoégheid wuurt. Veural umdet ik zelf kinder heb in dae laeftiéd. Die zien netuurlik hiel niejsgierig.
2. Waorum vindse ’t belangriék um dich in te zette veur de Vastelaovend?
Ik vind ‘t belangriek det vastelaovend blief bestaon. Ik heuf thoés auk ech neet veur te stelle um op vakansie te gaon met de dolle daag. We zegge altiéd ‘Op vakantie kinse 51 waeke per jaor, maar neet mit vastelaovend’. Ik zeen wal verschille tösse vastelaovend viere in de stad en in ein dörp.
In d’n Bookend zuusse det ‘t lastiger wuurt um ‘t elk jaor weer aantrekkelik te make en de minse nao Boostenhof te kriege. De balle en recepties veuraaf en de twië daag in Boostenhof mit Vastelaovend zien altiéd erg gezellig. Ik bin dan auk altiéd present. Auk leuk det De 3-kes idder jaor op maondaag de trouwerie duit begeleide.
De samewerking tösse jeugclub Don Bosco en de Worteleschrabbers geit erg good. Zeej weite jaorliks ein good programma neer te zette. De stad liek waal mit ’t jaor drökker te waere.
3. Bliefse dich in de toekoms inzette veur de Vastelaovend?
Ik haop det ik nog jaore de proklamasie meug schriéve veur de Jeugprins of -prinses. Op dees meniér blief ik mien steinke beejdrage aan de Bookendse vastelaovend. De jeugclub haet gelökkig vuul entoesiaste vreejwilligers die zich vol euvergave inzette um de jeugvastelaovend meugelik te make.
Good is auk um te zeen det d’r op dit moment weer genôg aanwas is um de jeug raod van elf same te stelle en ein trio oét te roope. Det is auk waal ens anders gewaes, umdet d’r simpelwaeg neet genôg kinder ware. Die zien d’r noow weer waal en zeej wille auk viere.
Tot besloét bin ik bliej det weej ôs kinder ’t vastelaovesvirus mit de paplaepel hebbe meigegaeve. We hebbe eur altiéd mei op paad genaome. Inmiddels zien ‘t 3 echte vastelaovesgekke die ’t fees veur gen gôld wille misse. De femilie Westheim is veurluipig dus nog neet oétgevierd in ôs kleine en hechte gemeinschap.
OPROOP: Kins dich ‘nne VV-er dae ’t verdeent auk ’n kompliment te kriege, dan laot ’t weite via info@de3kes.nl. In november verrasse we weer emus in de Gemeinte Venlo mit ‘nne helium-ballon!
