Veur de 5e kier organiseert De 3-kes in samewerking mit de Stadsbieb Venlo ’t Vastelaoves-Kefee. Auk deese kier wuurt d’r euver ein onderwerp gepraot. L1-journalis Lody Trepels is weer de prissentator en interviewer. D’r zien veer deskundige die praote euver ’t onderwerp BoereBroélof. Names de Boereraod is Sjraar Hoeben aanwezig, Wim Pollux schuuf aan names de boérebroélof van de femilie Pollux en de Mustangs, Luc Schroembges de sirremonimeister van ’t Belvendse boeregezelsjap is d’r en vanoét de Thietuite oét Lomm kump Cindy in t Zand. Netuurlik waere de gesprekke waer aafgewisseld mit meziék. De leedjes waere gebrach door Marinho (zang) en Dave (piano). ’t Belaof waer ‘nne sfeervolle en gezellige aovend te waere.

De entreepriés is 5- euro. Heej kriege minse 2 consumpties en ein köpke tomatesoep veur truuk. Bin d’r beej en bestel dien kaertje via sander@de3kes.nl. De aovend vindt dinsdaag 6 fibberwarie plaats in ’t laeskefee van de Stadsbieb!