Weej hebbe ’t ziér dreuvige niejs gekrege det op woensdaag 30 jannewarie d’n hiér Henk van Lunenburg onverwachs is euverleeje. Henk waas ‘nne op en top Vastelaovesman mit ein groët hert veur De 3-kes. Vanaaf ’t begin -2004- waas hae lid van ’t Comité van Aanbevaeling van De 3-kes. Maar zelfs dao veur sprook hae mit ald veurzitter Sander al dökker euver De 3-kes. Dit twietal had eine biezondere band mit elkaar en wis elkaar op vastelaovesgebied te inspirere mit oétspraoke. Mede door de inbring van Henk is De 3-kes oétgegreujd tot de vereiniging die ’t noow is. Hae dach altiéd positief kritisch mei. Benaodrökte de gooje zake, maar wis ôs auk de spegel veur te halde.

Hae waas altiéd present tiédes de vergadering van ’t Comité in ’t veurjaor. En vreejwaal altiéd had hae waat aanteikeninge bezig en reep hae weer ziér interessante dinger wao weej as De 3-kes vaerder euver nao kôste dinke. Zoé auk nog aafgelaupe veurjaor. Auk heej brach hae weer ein gedachte in die weej hebbe vertaald nao ein niej initiatief. Dit gaon weej op Vastelaoveszondaag 3 maart 2019 bekindmake. Op d’n daag det De 3-kes offisjeel 16 jaor besteit.

Weej zulle nog dök truuk dinke aan Henk. ‘nne Mins mit ’n ongeluiflik groët hert veur de Vastelaovend. Neet allein veur De 3-kes, maar auk veur de Wortelepin en beejveurbeeld optochclub Utopia. Mit name de jeug-vastelaovend vond Henk belangriek.

Hae is auk mede pionier gewaes beej ’t projek BCL-Treffen 2016. En haet same de iërste stappe gezatte um ’t projek nao Groët-Venlo te haole. Heejnao haet hae zich ingezatte veur de aktiviteitekemissie. Waobeej ’t jeug-BCL-Treffe ein belangrieke plaats had.

Henk dank veur alles waas dich veur de Vastelaovend hes gedaon. We zulle dien advieze, gevraog en ongevraog, ontzettend gaon misse. Hoije!

Names alle leeje,

Rob Jacobs
Veurzitter