Groët Venlo bedank veur de geweldige daag

’t Zit d’r helaas weer op. De dolle daag zien veurbeej en de peks-Kes meuge weer in de kas. De Groët-Venloosche Nar begós vriédaag 2 fibberwarie aan ziene zegetoch. Nao ’t intern veurstelle in de alde woénkamer van Lenie van kefee de Baek brook de daag van ’t oétroope aan. Waat eine daag. ’t Waas prachtig weer, ‘nne sjieke optoch en ein top oétroope op ein bomvolle mert.

Heejnao woort d’r vastelaovend op de Maas gevierd en ’s aoves inkele bezeuke aafgelag. De zondaag stond in ’t teike van de brunch beej de Nar, ontvangs stadhoés, lekker borrele, waat bezeuke aaflegge en ’t privefees van Nar Levi I. Op maondaag ’t fortissimokonsert, dinsdaags ein zier sjiek Vastelaoves-kefee in de Stadsbieb en op woensdaag ’t aete mit de ald-narre. Donderdaag, vriédaag en zaoterdaag is d’r daor Groët-Venlo getrokke en woort door diverse bezeuke aafgelag.

En toen brooke de dolle daag aan. Vastelaoveszondaag, -maondaag en dinsdaag ware onvergaetelik. Weej zien van Belvend wies Arcen gewaes en hebbe euveral genaote van de gasvreejheid en de joeks. Dit jaor trok de Nar mei in d’n Tegelse optoch. ’t Waas super weer en mit ein lekker zunke woort door ’t Tegelse centrum getrokke. Netuurlik  waas d’r dinsdaagaovend efkes ein träönke.

En noow is ’t Aswoensdaag… is alles veurbeej! Bedank idderein veur de sjieke momente. Weej gaon naogenete en langzaam veuroét kieke nao ’t seizoen 2018-2019!

Gen reacties beej "Groët Venlo bedank veur de geweldige daag"