Skip to content

Niejsberich

Groët Venloosche Nar 2017: Rob Jacobs

De 14e Groët Venloosche Nar is zaoterdaag 18 fibberwarie geprissenteerd. De 24 jeurige Rob Jacobs woort door Peter Ottenheym oétgeroope veur ‘t stadhoés. Hae meug de kômmende daag regere euver alle inwoéners van de gemeinte Venlo.

In optoch trok de groëte onbekinde door de straote van de binnenstad. D’r ware ruuém 25 optochdeilnemers. Veur ’t stadhoés vond de apotheose plaats. Peter Ottenheym, lid van de Kölsche Funke rut-wieß vun 1823 e.V. had de iér de Nar te installere. De Groët Venloosche Nar 2017 luustert nao de naam Rob Jacobs.

Hij zoog op 11 maart 1992 ‘t laevesleech in Bliërick, wao hae auk opgreujde mit zien zus Nicole. De Nar kump oét ein ech Groët-Venloos gezin. Zien mooder kump oét Bliërick, zien vader oét Venlo, opa oét Tegele en oma oét Velde. Rob’s schoëllaupbaan zuuét d’r as volg oét: Klingerbergschoël, ‘t Blariacumcollege en inmiddels is hae 5e jaors student geneeskunde aan de universiteit van Mestreech. As hae klaor is mit dees studie wilt hae vaerder studere om zich te specialisere tot longarts. Rob haet ein relasie mit Gwenda.

In ziene vreejetiéd is Rob aktief beej de Bliërickse Herte as musicerend lid, bestuurslid en hae gaef slaagwerkles aan inkele leerlinge. Op dit moment is hae auk ein van de kartrekkers van ‘t 60-jaorig jubileum van de Bliërickse Herte. Daornaeve is hae vanaaf 2012 aktief beej De 3-kes in verschillende functies en mak hae deil oét van de Joeksjagers. ‘t Is de iërste kier det ein Groët-Venloosche Nar vanoét de vereiniging is gekaoze. Veurzitter Sander Mattheijssen: “Rob is een echte Vastelaovesgek. ‘t mak dan neet oét ofse waal of gen lid bis van De 3-kes. Ik heb de aafgelaupe jaore gezeen det hae op ein gooje menier bezig is mit ‘t cultuurgood vastelaovend en heb d’r ‘t volste vertrouwe in det hae de funksie op ein perfekte menier geit invulle.”

De Nar van 2017 is eine laevesgeneeter dae gaer bezig is. ‘t regele en organisere zit in zien karakter. Hae is gaer onder de minse en vindt ‘t belangriék det ‘t fees Vastelaovend blief bestaon. De kômmende daag goeït hae d’r nog ein extra schupke bovenop… onder ‘t motto ‘Laeve de 3!’.

Proklamasie 2017
Kiek heej nao ’n kort filmke euver de Nar 2017
Bekiek heej ein sfeerverslaag

Foto: Zebra Fotostudio’s, Peter de Ronde

 

Ander niejs

11-11 mier dudelikheid euver seizoen 2021
De leeje van De 3-kes
Blief gezond! In deese biezondere tiéd
UPDATE: ‘t Zien biezondere tieje.