De 15e Groët Venloosche Nar is zaoterdaag 3 fibberwarie geprissenteerd. De 24 jeurige Levi Spaaij woort daor Ron Dings oétgeroope veur ‘t stadhuis. Hae meug de kômmende daag regere euver alle inwoéners van de gemeinte Venlo.
In optoch trok de groëte onbekinde daor de straote van de binnestad. Veur ‘t stadhoés vond de apotheose plaats. Ron Dings, zenger van dialekband Van Gelder, had de iér de Nar te installere. De Groët Venloosche Nar 2018 luustert nao de naam Levi Spaaij.
Hae zoog op 13 april 1993 ‘t laevesleech in Bliërick, wao hae auk opgreujde mit zien zus Mara en elders. De Nar kump oét ein Vastelaovesgezin. Hae haet ‘t fees mit de paplaepel binnegekrege. Same mit zien vader is hae al jaore lid van de Wortelepin in Bliërick. Heej waas hae van 2005 wies 2009 jeugvors. De schoéllaupbaan van Levi zoog d’r as volg oét: ’t Palet, ‘t Blariacumcollege en de Hoége Laboratoriumschoél in Eindhoven. Hae is werkzaam beej Bayern in Numhem en kontroleert heej de kwaliteit van ‘t zaod veur greunte- en fruittelers. Levi woént in de Venlose binnestad same mit zien vriendin Anne Hovens.
In zien vreejetiéd is Levi aktief beej de Wortelepin as lid van de jeugkemissie en speult hae kanopolo beej de Viking in Venlo. Daornaeve is hae fervent leefhebber van ‘t Vastelaovesfees. Veurzitter Rob Jacobs: “Levi is gek van Vastelaovend. Hae wet as gen ander hoe ‘t spel werk als lid van de Wortelepin en as jeugvors haet hae vruuger podiumervaring opgedaon. Ik heb d’r dan auk ‘t volste vertrouwe in det hae de funksie op ein perfekte menier geit invölle.”
De Nar van 2018 neump zichzelf eine luie perfektionis dae gaer waat veur emus anders euver haet. Hae is gaer onder de minse en in ‘t biezonder tiédes de dolle daag. De kômmende daag trek Nar Levi I daor de gemeinte Venlo onder ‘t motto ‘3 ’t getal van heej’.
Foto Zebra Fotostudio’s, Peter de Ronde
