De 16e Groët Venloosche Nar is zaoterdag 23 fibberwarie geprissenteerd. De 21 jeurige Dylan Schell woort door Marinho Peters oétgeroope veur ‘t stadhoés. Hae meug de kômmende daag regere euver alle inwoéners van de gemeinte Venlo.
In optoch trok de groëte onbekinde door de straote van de binnestad. Veur ‘t stadhoés vond de apotheose plaats. Marinho Peters, zenger van dialekband Linke Mik, had de iér de Nar te installere. De Groët Venloosche Nar 2019 het Dylan Schell en zoog op 14 oktoéber 1997, dreej waeke te laat, ‘t laevesleech in ‘t Venlose ziekehoés. Hae greujde op in de Bookend. Heej woént hae nog steeds mit zien elders en jongere broor Brian. De femilie Schell viert de dolle daag jaorliks hiel intensief. Dylan haet de ‘vastelaovend’ dus mit de spraekwoordelijke paplepel binnegekrege.
De Nar is in ‘t verleeje aktief gewaes in de Bookendse gemeinschap. Zoé waas hae aktief beej jeugclub Don Bosco en is hae begeleider gewaes van de jeug vastelaovend in ‘t dörp. Beej de jaorlikse Sint Maartenviering haet hae inkele kiere de rol van zwerver gespeuld. Op sportief gebied is Dylan lid gewaes van Handbal Venlo, judoclub Bliërick en volleybalvereiniging Baolder.
Dylan haet zien middelbare schoéltiéd doorgebrach op ‘t Blariacumcollege. Heejnao haet hae de opleiding stylis gevolg bij SintLucas in Boxtel. De intensie is um in ‘t naojaor te starte mit ein vervolgopleiding richting eventmanagement. Doordewaeks is hae werkzaam beej Nizza bloembinders en in ‘t weekend bij kefee de Baek. Hae helt van gezelligheid en feesviere en is gaer onder de minse. Ein van zien hobby’s is ‘t luustere nao dialekmeziék van de Vrijbuiters en Minsekinder.
Veurzitter Rob Jacobs: “Dylan is inkele jaore geleeje as vreejwilliger betrokke gewaes beej De 3-kes. Weej hebbe um toen liere kinne as ein ziér entoesiaste en gezellige persoeén. As fervent leefhebber van de dolle daag is hae in 2019 de juuste man op de juuste plek.” De kômmende daag trek Nar Dylan I door de gemeinte Venlo onder ‘t motto ‘Laef dich oét en trek ’n gekke snoét’.
Foto: Zebra Fotostudio’s, Peter de Ronde (klik op de foto um se groëter te make)
