De 18e Groët Venloosche Nar is Mike Teixeira, in de regio auk waal bekind as DJ ChocoToff en mede-eigenaer van café de Lange. De 34 jeurige woort zaoterdaag 11 fibberwarie door wethalder Tom Verhaegh oétgeroope op de mert veur ‘t stadhoés. Onder ‘t môtto ‘Wao zien die hendjes? geit Mike I wies Aswoensdaag mit ein mobiele DJ-booth op paad.
In optoch trok de groëte onbekinde door de straote van de binnestad. D’r ware weer vuul kollega gezelschappe aanwezig um de intoch zoé biezonder meugelik te make. Veur ‘t stadhoés vond de apotheose plaats. Wethalder Tom Verhaegh moch de Nar installere. De Groët Venloosche Nar 2023 het Mike Teixeira en woort op 20 november 1988 in Rotterdam gebaore. Heej woénde hae tot 2002. Toen hae 13 jaor waas verhoésde hae nao Tegele. In de brugklas kwaam Mike dankzij zien liérare Jacques-Paul Joosten en Mark Janssen in aanraking mit ‘t vastelaovesfees.
In 2004 ging hae veur de iërste kier de dolle daag viere en zoog toen de iërste Groët-Venloosche Nar veurbeejkômme. “Vanaaf det moment bin ik De 3-kes gaon volge. Ik heb dökker gehaop dat ik gevraog zoel waere, maar mit mien Rotterdamse- en Kaapverdische achtergrond noeït verwach det die vraog zoel kômme. Det De 3-kes dit duit gaef weer aan wie de vereiniging gaer ‘t fees mit idderein wilt viere”, aldus de kersverse Nar.
Mike is dus neet opgegreujd mit ‘t vastelaovesvirus. Toch is hae inmiddels ein groët leefhebber van ‘t fees. Dankzij dialekméziek haet hae zich ‘t dialek eige gemak. In deese periode van ‘t jaor is hae auk bekind as Joeks DJ ChocoToff. Daornaeve is hae mit zien verloofde Lincy eigenaer van kefee De Lange op de Parade in Venlo. Auk is hae bedriéfsleider beej beerlokaal Smaek in Hors. In dees plaats woéne Mike en Lincy auk. In ziene vreejetiéd geit hae gaer nao attraksiepark de Efteling.
Veurzitter Rob Jacobs: “Nao ‘nne Kloon veurig jaor prissentere weej noow ‘nne gebaore Rotterdammer, dae woénachtig is in Hors. Mike haet waal degelik ‘nne band mit de gemeinte Venlo en de ‘vastelaovend’. Hij tummert al jaore aan de waeg as Joeks DJ ChocoToff. In 2021 haet Mike meigewerk as DJ aan ‘nne online clubaovend dae weej hadde georganiseerd. Zoé is hae beej mich in ‘t vizier gekômme. De zuus beej Mike de leefde veur vastelaovend en in ‘t biezonder veur ôs vereiniging. De juuste man veur ‘t Narreschap waat mich betref.” De kômmende daag trek Nar Mike I door de gemeinte Venlo onder ‘t motto ‘Wao zien die hendjes?’. Tiédes ziene rondgang haet hae ‘nne mobiele DJ booth beej zich um euveral auk muzikaal van zich te laote huure.
Laes heej de proklamasie
Foto: Peter de Ronde
