Iddere 3e zaoterdaag van de maond zette weej eine echte VastelaovesVreejwilliger in ’t zunke. Wae zien die stille krachte op de achtergrond? Vandaag de 11e en taeves letste VV-er Hans Derix van de Wuilus oét Velde.
- Wat duis dich um de Gekke Maondaag / Vastelaovend laevendig te halde?
Gekke maondaag en vastelaovend zien twié verschillende dinger. Se lieke netuurlik waal hiel erg op mekaar. In Velde hebbe weej de tradisie van de Gekke Maondaag op de letste maondaag van jannewarie. Dus asse aan ‘nne Veldense Wuilus vruugs ’t euver Vastelaovend te hebbe, dan geit ’t euver de Gekke maondaag en alles waat dao beej huurt.
Ik waas as kleine blaag al gek van dit biezondere fees. En die leefde veur de Gekke Maondaag en de vastelaovend is auk noeïts weggegaon.
In 2003 woort ik gevraog um lid te waere van de Raod van Ellef van de Wuilus. Ik vond ’t ein iér um dees vraog gesteld te kriege en heufde dan auk neet lang nao te dinke. ’t Antwoord waas: ‘Jao’.
As lid van de Wuilus meugse alles mei organisere rondum de Gekke Maondaag. Dink beejveurbeeld aan ‘t liedjesmatinee, de Ellufde van de Ellufde, ‘t 3 daagse zittingswiekend, gardefestival, prinsebal, prinseresepsie, Gekke Maondaag en Brokke Dinsdaag. Idder Raodslid zit in ein of mierdere kemissies. Heejdoor zien de Raodsleeje allemaol betrokke beej ’t organisere van alle aktiviteite. Same mit alle leeje en de vierders in Velde make we d’r idder jaor ein groët fees van. Same halde we dees biezondere tradisie laevendig.
En eigelik hebbe weej bes waal mazzel, want weej viere Gekke Maondaag in jannewarie én doornao nog ens vastelaovend. De vastelaovend viere weej in andere dörpe in de gemeinte of in de stad.
2. Waorum vinse ’t belangriék um dich in te zette veur de Gekke Maondaag?
Zoéwaal de Gekke Maondaag as de vastelaovend meuge noeïts verlaore gaon. Asse idder jaor weer zuus wie jongk en ald heej mei bezig is. Wievuul werk en tiéd minse d’r instaeke. Ik vind ’t ech biezonder um te zeen. Minse laeve ech toe nao ’t fees. En veural in deese coronatiéd merkse det minse gaer wille organisere en viere.
Toen ik beej de Wuilus kwaam in 2003 bin ik 1 jaor aspirant lid gewaes. Nao det jaor woort ik metein gevraog um sikkertaris en bestuurslid van de vereiniging te waere. Asse in ‘t bestuur zits bisse euveral beej betrokke. En as sikkertaris bisse de kontakpersoén veur idderein. Auk veur collegavereiniginge oét Velde en dao boéte. Ik heb ’t altiéd gaer gedaon en mich mit vuul plezeer ingezatte.
3. Bliefse dich in de toekoms inzette veur de Gekke Maondaag?
Heej kin ik kort en duidelik op reagere: Netuurlik, mit alle plezeer. Dreej jaor geleeje heb ik aangegaeve ’t sikkertariaat te wille euverdrage aan ‘nne opvolger. Inmiddels haet de Wuilus dus ‘nne gooje nieje sikkertaris. Na 18 jaor lid van de Raod van Ellef heb ik auk aangegaeve heej te wille stoppe. Door corona heb ik det besloét nog maar efkes oétgesteld.
De Wuilus haet beslaote de Prinsebal en Gekke Maondaag te verplaatse nao mei 2022. Haopelik kinne we dan weer ens lekker geneete en viere. En kin ik dan mien periode as Raodslid op ein gooje meniér aafsloéte.
Asse zoé lang beej de Raod bis gewaes, meugse toetraeje tot de Iéreleeje. Beej dees gezellige club gaon ik mich in de toekoms inzette. Ik blief dus betrokke beej de Gekke Maondaag en alles waat door umhaer zit.
Haopelik melde zich weer nieje minse um lid te waere van De Wuilus. Ik kin idderein ’t aanbevaele. ’t Is harstikke leuk en gezellig. As d’r gen minse zien die ’t organisere is d’r auk genne Gekke Maondaag.
Ik vind ’t in idders geval ein groëte iér um beej de vereineging die zich in Velde Gekke Maondaagvereineging de Wuilus neump te meuge huure.
#Samemakeweejdevastelaovend #vastelaovesvreejwilliger #de3kes #vastelaovend
