Door ’t hoégwater hebbe we beslaote um deese kier neet op de 3e maar op de 4e zaoterdaag van de maond ‘nn echte VastelaovesVreejwilliger in ’t zunke te zette. Wae zien die stille krachte op de achtergrond? De viéfde VV-er is Huub Beeren, aktief beej De Wien en umroop Venlo radio.
1. Waat duis dich um de vastelaovend laevendig te halde?
Ik bin gek van Vastelaovend. Al van kinds aaf aan. Ik bin vreejwilliger beej Umroop Venlo radio. Heej heb ik in ’t verleeje van alles gedaon op ’t gebied van radio make en de vastelaovend promote. Ik heb auk dökker tv-reclames ingespraoke die rondum de vastelaovend waere oétgezonde. Momenteel bin ik nog betrokke beej de Top 555 en ik meug tiédes de Vastelaovend de non-stop playlist samestelle. Van vriédaagaovend 21.00 oor wies dinsdaag 24.00 oor. Ik dreij dan meziék oét alle stadsdeile, dus auk leedjes van de Wien. De club wao ik nog altiéd actief bin. In 1984 waas ik adjudant beej prins Piet I (Beckers). Doornaeve beheer ik op facebook de groep ‘Venlo mien Ald’. Heej halde we de vastelaovend laevendig door alde foto’s online te zette.
2. Waorum vindse ’t belangriék um dich in te zette veur de Vastelaovend?
Vastelaovend is veur mich Limburgse cultuur. ’t Is onlosmakelik mit Venlo verbonde. Door mich te blieve inzette kin ik andere minse laote genete van de Vastelaovend. Auk minse die neet mier zoé good kinne. Door aktief te blieve op de radio, facebook en beej de Wien bliefse de vastelaovend promote. Ik zeg altiéd ‘Vastelaovend is veur idderein erm en riëk, Vastelaovend is maskes en meziëk’. Zoé lang ’t kin blief ik mich inzette veur dit geweldige fees. In mien auge meug det noeïts verlaore gaon.
3. Bliefse dich in de toekoms inzette veur de Vastelaovend?
Zeker weite. Ik bin en blief ‘nne echte Wienbol. Wie gezag in 1984 zelf mei veurop meuge gaon. Doornao 14 jaor Raod van Elluf, 10 jaor technische kemissie en vanaaf 2001 aktief in de Joekskemissie. ’t Is fijn um mit ‘nne leuke groep enthousiaste minse Vastelaovend te blieve bringe. Weej vergadere maondeliks. Haopelik kin ôzze leedjesmatinee op zondaag 10 oktober in Domani doorgaon. Momenteel bin ik auk nog betrokke beej ‘t up to date halde van ’t leedjesarchief van de Wien. Zoé zörge weej det we ôs historie beware veur ’t naogeslach. In det archief zit netuurlik auk det prachtige leedje ‘As ik dich zeen’. Ik haop det nog lang te meuge zinge mit de vastelaovend.
OPROOP: Kins dich ‘nne VV-er dae ’t verdeent auk ’n kompliment te kriege, dan laot ’t weite via info@de3kes.nl. In augustus verrasse we weer emus in de Gemeinte Venlo mit ‘nne helium-ballon! #Samemakeweejdevastelaovend
