De zaoterdaag veur de 11e van de 11e wuurt d’r tradisiegetrouw intern aafscheid genaome van de Groët Venloosche Nar. In 2017 is det d’n hiër Rob Jacobs. Hae woort zaoterdaag 18 fibberwarie onder groëte belangstelling geproklameerd door Peter Ottenheym van Die Kölsche Funke rut-wieß vun 1823 e. V.

Heejnao ging hae Groët-Venlo door en leet zich in idder stadsdeil zeen en huure. ’t Waas ‘nne onvergaetelikke tiéd. En hoewel dao nog inkele optraejes gepland staon, neeme weej toch noow al intern aafscheid van ôzze hoégheid 2017.

De baove verdeeping (alde woénkamer Lenie) is weer de feeslokasie. Onder ’t genot van ein hepke en drengske wuurt d’r same truukgekeke. Tiédes de aovend wuurt Nar Rob I auk opgenaome door de Sociëteit Ald Narre.