Nao ein stumperiode van 3×3 daag is de winnaer bekind van de ‘Groët Venloosche Vastelaoves Injeksie. De stummeteller stond 9 jannewarie um 24.00 oor op de onderstaonde stand:
- Jeug De Thiëtuite, 332 stumme
- Jeugdclub Don Bosco, 272 stumme
- Jeugkemissie De Wortelepin, 132 stumme
Dit beteikent det de jeugaafdeiling van De Thiëtuite de iërste edisie van de ‘Groët Venloosche Vastelaoves Injeksie’ haet gewonne. Zeej gaon ’t bedraag gebroéke um nieje mantels te kaupe veur eur jeugtrio. De 3-kes is bliej det ’t geld good terech kump en det weej op dees menier de Vastelaovend in de gemeinte Venlo mei in stand halde.
In november hebbe zich 7 organisasies gemeld mit ein ideej. Ôs Comité van Aanbevaeling haet vervolges heej oét 3 genomineerde gekaoze. Dees meuste de iërste 9 daag van jannewarie zoévuul meugelik ‘likes’ zeen te kriege op eur berich op de facebookpagina van De 3-kes.
Bianca Groetelaers van de Thiëtuite reageert entoesias: “Weej zien super bliej mit dit geldbedraag. De jeugkarneval viert eur 5×11 jeurig jubileum. Det is ein moeïe raeje um nieje mantels te kaupe veur de hoégheid en zien adjudante. De jeug haet immers de toekoms. Weej vinde ’t initiatief van de De 3-kes ech geweldig. 332 x bedank heej veur.” De cheque wuurt zondaag 12 jannewarie tiédes De 3-kes Narre-Zitting oétgereik.
De Groët Venloosche Vastelaoves Injeksie is ein jaorliks initiatief van De 3-kes. In november 2020 kinne organisasies en persoéne zich weer melde mit ’n verzeuk um ondersteuning van € 333,33.
