Skip to content

Niejsberich

Marja en Ton

Marja & Ton VV-ers van de maond mei

Iddere 3e zaoterdaag van de maond zette weej wies aan Vastelaovend 2022 eine echte VastelaovesVreejwilliger in ’t zunke. Wae zien die stille krachte op de achtergrond? De derde VV-er is ’t echpaar Jonkers. Marja en Ton zien Poerkers van kop wiés tién.

1. Waat doot geej um de vastelaovend laevendig te halde?

Beej de Poerker hebbe weej verschillende funksies vervuld. Marja haet zich jaore ingezatte beej de jeugkemissie. Ton is lid gewaes van de Raod van 11 en waas daonao veurzitter van de optochkemissie. Same hebbe weej 11 prinse oétgezôch toen weej lid ware van de Prinsekemissie. In 2004 moch Ton zelf de scepter zwei-je euver de Poerkerplak, same mit zien adjudante Lei en Jos.

Auk legge weej al haos 30 jaor alle aktiviteite van de Poerker vas op beeld. De letste jaore zien weej nimmer aktief onderdeil van ‘n kemissie binne de Poerker, maar verliéne weej waal allerlei hand-en-spandeenste. Beejveurbeeld door mei te doon mit de aoliebölverkaup, ‘t Poerkerkiene mei te organisere en twié kier per jaor langs de deure te gaon um bloome te verkaupe.

2. Waorum vindt geej ’t belangriék um ôg in te zette veur de Vastelaovend?

Vastelaovend viere zit ôs in ‘t blood en det hebbe weej in de laup van de jaore auk vuul gevierd op verschillende meniere. Aktief in ‘t vereinigingslaeve, meidoon in optochte en zelf op paad gaon.

Weej vinde Vastelaovend neet allein ‘n gezellig fees, maar veural auk ‘n sosjale gebeurtenis! Gelökkig hebbe ôs kinder en kleinkinder ‘t vastelaovesvirus  van ôs geërf, want die doon elk jaor mit vuul entoesiasme mei mit dees dreej dolle daag.

Weej kinne dus waal zegge dat weej vastelaovend ‘n hiel belangriek fees vinde en haope det dees tradisie nog jaore blief bestaon. Det kin allein as alle vreejwilligers zich beej alle clubkes, optochgroepe, wagebouwers, joekskapelle en vereiniginge blieve inzette. Wat betref corona: ‘t Vastelaovesvirus is ntuurlik sterker dan ‘t Coronavirus!

3. Blief geej ôg in de toekoms inzette veur de Vastelaovend?

Op Poerkerzaoterdaag hebbe weej de hoéskamer vol um mit vrinde en femilie vastelaovend te viere. D’r wuurd dan gezörg veur aete, drinke en netuurlik auk meziék. Idder jaor is d’r wal ‘n joekskepel of ein of andere arties dae op wilt traeje. Det is idder jaor ein super gezellig gebeure. De 3-kes is auk waal ens op bezeuk gewaes mit de Groët Venloosche Nar. Helaas haet Corona ‘t letste jaor roet in ‘t aete gegoeid, maar kômmend jaor gaon weej d’r weer gans veur. Weej vinde ’t belangriék det de vastelaovestradisie blief veurt bestaon. Wao weej kinne, blieve weej ôs steinke beejdrage.

OPROOP: Kins dich ‘nne VV-er dae ’t verdeent auk ’n kompliment te kriege, dan laot ’t weite via info@de3kes.nl. In juni verrasse we weer emus in de Gemeinte Venlo mit ‘nne helium-ballon!

#Samemakeweejdevastelaovend

Ander niejs

Sander Mattheijssen keuninklik onderscheide
Mit gepaste trots felicitere weej
Mitch van der Meij in ‘t zunke
Iddere 3e zaoterdaag van de