Skip to content

Niejsberich

Schermafbeelding 2021-04-17 om 14.39.21

Mitch van der Meij in ’t zunke

Iddere 3e zaoterdaag van de maond zette weej wies aan Vastelaovend 2022 eine echte VastelaovesVreejwilliger in ’t zunke. Wae zien die stille krachte op de achtergrond? De twiëde VV-er is Mitch van der Meij, leefhebber van ’t fees en lid van De Eikes.

1. Waat duis dich um de vastelaovend laevendig te halde?

Veural alle daag vastelaovend viere met ‘t gezin en vrinde van VG de Eikes en VK de Keikes. Netuurlik beginne weej al waeke van te veure. Momenteel neet verbônde aan ein officiële vereiniging. Maar vastelaovesspaore waal achtergelaote. Ik heb jaore meigedaon aan de optochte van Bliërick (bin eine Wortelepin) en Tegele (woén in ’t Oelesriék). Deil oétgemak van de Oeleskrant redactie en mit de Eikes hebbe we ‘Ut Sambal’ bedach en georganiseerd. Nao 11 jaor hebbe we ’t Sambal euvergedrage aan andere vastelaovesgekke. Sjiék det ’t Bal nog altiéd zoé suksesvol is in de Tegelse Vastelaovend. Ik heb 11 jaor lang de programmering geregeld veur ’t Sambal.

2. Waorum vindse ’t belangriék um Vastelaovend te viere?

Ik heb ’t viere gelierd in ‘t Muspelheim in ’t Vastenaovendkamp in Bliërick. As kleine blaag heb ik zelfs eine buut veurgedrage op ein zitting. Miene ome Baer had de buut veur mich geschreve. ’t Is aevel beej eine kier gebleeve. Mien elders hebbe mich en mien breurkes altiéd mei op sleiptouw genaome mit die daag. Weej ginge nao alle soorte  vastelaovesactiviteite, mit name in Bliërick en Venlo. As weej op stap ware gewaes, waas d’r in huize van der Meij auk altiéd afterparty. Dan kwaame de hudjes van Nellie van de zölder. Ein actieve vastelaovesfemilie kinse wal stelle. Dit haet de basis gelag veur mien leefde veur ’t fees. Ik doon mit mien kinder ’t zelfde. Zeej kriege ’t mit de paplaepel ingegaeve.

3. Bliefse dich in de toekoms inzette veur de Vastelaovend?

Op dit moment bin ik efkes waat minder aktief asse ’t hes euver ’t organisere van aktiviteite. Ik betrap mich d’r zelf op det ik ideeje blief bedinke die te make hebbe mit de vastelaovend.

Miene vastelaovend speult zich aaf in Bliërick, Tegele en Venlo. Det is ’n bietje mien joeks en joetsgebied. Ik heb beejveurbeeld nog genôg optochideeje ligge. Misschien det ik ’t meitrekke as faatse waal weer niej laeve gaon inblaoze of mien ideeje deil mit andere faatselaupers. In Venlo wil ik gaer as vierder in de lampe blieve hange en in Tegele bin ik aktief beej VG de Eikes. Die wil ik gaer ein gezich blieve gaeve. Weej doon beejveurbeeld nog idder jaor mit ein delegasie mei aan De 3-kes optoch. Wae wet waat de toekôms bringk. Veurluipig kin ik mien ei nog waal kwiét. ‘t Belangriékste is det minse ’t fees blieve viere. Det heuf neet altiéd mit groëtschalige evenemente, auk mit kleine initiatieve helse de vastelaovend laevendig. Dus in 2022 zien weej mit de femilie, de Eikes en de Keikes weer van de partie!

OPROOP: Kins dich ‘nne VV-er dae ’t verdeent auk ’n kompliment te kriege, dan laot ’t weite via info@de3kes.nl. In mei verrasse we weer emus in de Gemeinte Venlo mit ‘nne helium-ballon!

#Samemakeweejdevastelaovend

Ander niejs

Anja Westheim de stille krach van oktober
Iddere 3e zaoterdaag van de
Stum mei beej de Rabo clubsupport aksie
De Rabo clubsupport aksie is