Skip to content

Niejsberich

Kristiel_site

Ôs eige Kristel VV-er van augustus

Iddere 3e zaoterdaag van de maond zette weej wies aan Vastelaovend 2022 eine echte VastelaovesVreejwilliger in ’t zunke. Wae zien die stille krachte op de achtergrond? De zesde VV-er is ôs eige lid Kristel Burgers.

1. Waat duis dich um de vastelaovend laevendig te halde?

In 2004 woort ik gevraog um lid te waere van De 3-kes. Ik woort metein beneump tot sikkertaris. Det heb ik mit vuul plezeer gedaon tot mei 2014. Nog altiéd bin ik lid van dit leuke gezelschap. Jaorliks organisere weej kwante aktiviteite veur vastelaovesvierders in Groët-Venlo.

Doornaeve bin ik al jaore betrokke beej de Bliërickse herte. Ik laup mei in de optochte van Hôlt-Bliërick en Bliërick. En in ’t verleeje holp ik auk mei beej de vastelaovesaovend van de Bliërickse herte. Ik heb inmiddels ein zoontje. De letste jaore hebbe weej um auk ’t vastelaovesvierus beejgebrach. Beej alle aktiviteite die weej bezeuke geit hae mei. De Kinderfemiliezitting van de Wortelepin vindt hae hiel leuk, maar netuurlik auk De 3-kes Narre-Zitting in de Venlonazaal.

2. Waorum vindse ’t belangriék um dich in te zette veur de Vastelaovend?

Vastelaovend huurt beej Limburg. ’t Is biezonder det weej det fees jaorliks viere. Ik bin auk van meining det ’t neet verlaore meug gaon. ’t Verbind minse, jôngk en ald. Ik zeen ’t auk in mien eige umgaeving. Oma’s die veur kleinkinder pekskes make en zoé ’t fees doorgaeve aan de volgende generasie vierders. Naeve miene inzet veur De 3-kes vind ik ’t auk leuk um op stap te gaon mit femilie en vrinde en elk jaor weer de nieje liedjes te oefene. En netuurlik idders kier weer ein nieje oétdossing bedinke. ’t Is ech ein fees um nao oét te kieke.

3. Bliefse dich in de toekoms inzette veur de Vastelaovend?

Absoluut! Mit veel plezeer ben ik nog altiéd lid van De 3-kes. Ik bin jaorelang ’t enige vrouwelikke lid gewaes. Inmiddels zien d’r mier dames lid van ôzze club. We hebbe ‘nne kei leuke groep minse die zich mit vuul entoesiasme inzette veur de vastelaovend. Det werk aanstaekelik. Ik wil mich nog jaorelang blieve inzette en same mit alle leeje en aanhang vastelaovend blieve viere in de gemeinte Venlo. ’t Is ech biezonder um idders kier weer te zeen wie d’r Vastelaovend wuurt gevierd van Belvend wiés Arce. Binne De 3-kes hald ik mich onder andere bezig mit ’t archivere van interessante informasie. We hebbe de aafgelaupe 20 jaor al van alles georganiseerd. Ik haop det we det nog minimaol 20 jaor volhalde.

OPROOP: Kins dich ‘nne VV-er dae ’t verdeent auk ’n kompliment te kriege, dan laot ’t weite via info@de3kes.nl. In september verrasse we weer emus in de Gemeinte Venlo mit ‘nne helium-ballon!

Ander niejs

Vastelaovesgek Jos Driessen in ’t zunke
Iddere 3e zaoterdaag van de
Huub Beeren vreejwilliger van juli
Door ’t hoégwater hebbe we