Nao zes suksesvolle edities vindt in 2020 auk weer ein Vastelaoves-kefee plaats. Op dinsdaag 18 fibberwarie organiseert De 3-kes beej kefee Stek deese biezondere aovond. ‘t Programma start um 20:00 oor en ‘t thema is ‘Joekskapel’.

De aovond wuurt geleid door journalis Lody Trepels. Taofelgaste zien Jeroen Engels van d’n Heiten Haspel, Huub Linssen van Kappes Kook, Femke Wolbertus van de Kösmuulkes en Martin van Boekholdt van de Mootwörm. De gaste praote euver verleeje, hede en de toekoms van de joekskapel in relasie tot vastelaovend.

Meziék is d’r weer van Dave Ververgaard en Marinho Peters. De Groët Venloosche Nar 2020 helt deese aovond zien ‘narrelezing’.

’t Vastelaoves-kefee wuurt live oétgezonde via De 3-kes radio. De entree is € 5,-, dit is inclusief koffie of thee beej binnekoms, ein konsumpsiemunt en ’n köpke tomatesoep tiedes de pauze. Rissserveer ein kaertje via sander@de3kes.nl. Kefee Stek is gevestig in Stadsbibliotheek Venlo.