Tiédes de algemeine leejevergadering is Rob Jacobs gekaoze as veurzitter van De 3-kes. Hae waas vice-voorzitter en is taeves de regerende Nar. Hae neemp ‘t stökske euver van Sander Mattheijssen.
De 25 jarige Rob Jacobs woort zaoterdaag 20 mei 2017 geïnstalleerd as veurzitter van De 3-kes. Hae is genne onbekinde binne de vereiniging. Sinds zien lidmaotschap in 2012 is hae bestuurslid, sikkertaris en vice-voorzitter gewaes en dit jaor zelfs Groët-Venloosche Nar. In ‘t dageliks laeve is Rob 5e jaars student geneeskunde aan de universiteit van Mestreech. Tiédes de jaorvergadering stumde alle leeje unaniem veur zien kandidatuur. Rob Jacobs: “Ik heb de aafgelaupe jaore gezeen det De 3-kes ein prachtige vereiniging is. Ik wil mich gaer as veurzitter de kômmende jaore inzette veur ‘t cultuurgood vastelaovend, waobeej ‘t ludieke karakter van ôzze klub neet verlaore meug gaon.”
Rob Jacobs neemp ‘t veurzitterschap euver van Sander Mattheijssen. Deese ald-veurzitter haet de funksie ruuém 1,5 jaor as ad interim bekleid. In dees periode is gezoch nao enne gooje opvolger. Sander: “Ik bin bliej det Rob dees moeïe taak op zicht neemp. ‘t Regele en organisere zit in zien karakter en hae is enne carnavalis pur sang.” Op dit moment is Rob Jacobs zoéwaal Nar as veurzitter van ‘t gezelschap. Noud Faassen woort tiédes de leejevergadering gekaoze as vice-veurzitter.
