Skip to content

Niejsberich

Jos Site

Vastelaovesgek Jos Driessen in ’t zunke

Iddere 3e zaoterdaag van de maond zette weej wies aan Vastelaovend 2022 eine echte VastelaovesVreejwilliger in ’t zunke. Wae zien die stille krachte op de achtergrond? De zevende VV-er is vastelaovesgek Jos Driessen oét Belfeld.

1. Waat duis dich um de vastelaovend laevendig te halde?

Vastelaovend is mich met de paplaepel ingegaeve, mien vader waas namelik 3 kier 11 jaor beej de Raod van Elf van d’n Oeles. Ik bin ongeviér 5 jaor beej de technische kemissie van d’n Oeles gewaes. Ik bin heej gestop umdet mien vastelaoveshert toch mier veur andere aktiviteite sleit.

Ik heufde neet lang nao te dinke, euver waat ik dan waal woel. Ik woel beej ein joekskapel. Zoé gezag zoé gedaon. Kômmend jaor bin ik precies 33 jaor lid van Sôkkerpaék. Nao al die jaore speul ik nog altiéd mit vuul  laevesvreug de  bariton.

Ik bin 12 maond per jaor mit vastelaovend bezig. D’r geit genne daag veurbeej det ik neet naodink euver ’t optochideej veur Belfeld en Tegele. Det is toch waal ’t hoégtepunt van ’t jaor. 2 um preciés te zien! Ik heb ein schrif in de kas ligge wao in ik alle ideeje opschriéf. As duo laup ik mit Joep Langendonk al hiel waat jaore mei in de optochte as De Wippers. We zien figuurlik al dökker in de priéze gevalle. En tiédes de letste optoch bin ik letterlik mit miene druúger umgevalle en nog gewond gerak aan mien hand. Ik heb auk nog waal ens meigelaupe in d’n L1 einzelganger optoch mit halfvaste.

En netuurlik luuster ik in ’t seizoen vreejwaal dageliks nao De 3-kes radio. Waat ein geweldig initiatief. Thoés waere se d’r waal ens gek van.

2. Waorum vindse ’t belangriék um dich in te zette veur de Vastelaovend?

Vastelaovend is ‘n kultureel volksfees det in iére gehalde môt waere. As ik huur det elders mit de kinder of kleinkinder op vekansie gaon, vind ik det erg jaomer.

Ik dink dan altiéd gank toch astebleef nao die 3 dolle daag mit de femilie op vekansie. Zörg desse dees prachtige tradisie euver brings op de volgende generasies. Waat zoel ’t leuk zien as elders of groët elders mit de (klein) kinder ein kreasie veur de optoch zoele make.

Ik bin alle daag op paad mit de Vastelaovend. Ik start op woensdaag mit de buutte-aovend in Tegele. Donderdaag mit de joekskapel nao Kölle en dan non-stop door wies Aswoesdaag.

Heerlik um effe ‘t serieuse laeve op ein ziejspaor te zette. Lekker ein pilske drinke in de kroege en veural plezeer make.

3. Bliefse dich in de toekoms inzette veur de Vastelaovend?

Jao! Det weit ik zeker. Al môt ik mit de rollater of scootmobiel ik môt en zal d’n optoch meimake as deilnemer.

Eigelik zoel ik auk bes gaer kinder op basisschoéle wille stimulere um mei te doon aan ’t fees en dan mit name aan d’n optoch. ’t Is zoé leuk um de veurpret te belaeve en zelf iets in mekaar te zette. En dan netuurlik d’n optochdaag zelf. Det is altiéd zoé geweldig.

Helaas zeen ik al jaore ein aafnemende belangstelling beej optochdeilnemers. Haopelik geit det weer verandere in de toekôms.

Netuurlik wil ik auk muzikaal aktief blieve beej Sôkkerpaek. Wie gezag kômmend jaor ein De 3-kes jubileum van 11×3 jaor lidmaotschap.

OPROOP: Kins dich ‘nne VV-er dae ’t verdeent auk ’n kompliment te kriege, dan laot ’t weite via info@de3kes.nl. In oktober verrasse we weer emus in de Gemeinte Venlo mit ‘nne helium-ballon!

Ander niejs

Anja Westheim de stille krach van oktober
Iddere 3e zaoterdaag van de
Stum mei beej de Rabo clubsupport aksie
De Rabo clubsupport aksie is