Veur de iërste kier zal ein vrouw de Groët Venloosche Nar bekind make. ’t Zal uberhaup neet dök zien veurgekômme det ein dame eine hoégheid bekind haet gemak in de Limburgse Vastelaoveswaereld. Normaliter is det toch de taak van de Vors, Spraeker of veurzitter.

In 2020 wuurt dus gekaoze veur de Euro-parlementariër en ald wethouder van de gemeinte Venlo Vera Tax. Weej weite det Vera de Vastelaovend ein werm hert toedruuég. Doornaeve vinde weej ’t belangriek um nao 16 manne, ens ein vrouw ’t hoége waord te laote oétspraeke.

Vera zelf vindt ’t biezonder en iérvol det het dit jaor de nieje hoégheid van De 3-kes bekind meug make. Det geit netuurlik gebeure aan de hand van 3 aanwiézinge en mit muzikale ondersteuning van dialekband Linke Mik.

Bin d’r beej zaoterdaag 15 fibberwarie –De 3-kes Daag– um 12.30 oor veur ’t Stadhoes, oppe mert in Venlo.

De 3-kes luuét idder jaor emus anders de Groët Venloosche Nar bekind make. Op deese pagina kinse laeze wae in ’t verleeje dees iér allemaol hebbe gehad.