De 3-kes is ’t Vastelaovesgezelschap van de gemeinte Venlo en offisjeel opgerich op vastelaovesmaondaag 03-03-03. De iërste aanzet woort op zaoterdaag 15 december 2001 gegaeve. Inmiddels is de vereiniging oétgegreujd tot ein vas element in de Groët-Venlose Vastelaovend. Vanaaf de oprichting haet De 3-kes geprobeerd ein gooje en inhaldelikke beejdrage te levere aan ’t cultuurgood vastelaovend.
Vanaaf ’t begin werke weej al mit beeld en geluuéd um ózze ideeje krach beej te zette. Dit haet in 2007 gerisselteerd tot ‘De 3-kes TV’, in 2009 hebbe weej ‘De 3-kes radio’ gelanceerd. Naeve ’t aktief viere, kommunicere weej dus auk gaer euver de Groët-Venlose Vastelaovend.
Vanaaf 2013 wuurt de Groët Venloosche Nar aopebaar oétgeroope op de mert veur ’t Stadhoés, veuraafgegaon door ‘nne kleine optoch.
In 2016 hebbe weej de organisasie van ’t Limburgse BCL-Treffe op ôs genaome. Heej is destiéds stichting Laeve de 3! veur opgerich.
In 2024 hebbe weej tiédes de 33ste Boétegewoeëne boéteziting veur ’t iérs samegewerk mit BBZ Venlo. We hebbe in ein glazehoés ‘Boétegewoeëne De 3-kes radio’ gemak.
In 2025 hebbe weej de iërste ‘De 3-kes wandeltoch’ georganiseerd, ism BBZ Venlo.
In 2027 kômme we opniej mit ein maatschappelik initiatief… later mier heej euver.