De 20e Groët Venloosche Nar is de 25-jeurige Benthe Steeghs oét Bliërick. Het woort op de Mert veur ‘t stadhoés door wethalder Frans Schatorjé bekindgemak. Dees entoesiaste dame geit wies Aswoensdaag op paad onder ‘t motto ‘Vastelaovend is emosi’.
Zaoterdaagochtend 22 fibberwarie verzamelde vuul vastelaovesvereniginge oét de gemeinte Venlo zich beej bioscoop City Cinema. Heej woort kinnis gemak mit de nog onbekinde Nar. In optoch ging ‘t vervolges richting ‘t stadhoés. Net zoé as veurig jaor kwame alle aanwezige hoéghede vanoét de parterre de buun op. Dialekband Linke Mik zörgde det alle hoéghede in ‘t muzikale zunke woorte gezatte. ‘t Sloétstök van ‘De 3-kes Parade’ waas de proklemasie van de Groët Venloosche Nar 2025.
Wereldburger
Dit jaor moch wethalder Frans Schatorjé de Nar van De 3-kes bekindmake. Nao dreej aanwiézinge kwaam ‘t hoëge woort d’r oét. De Groët Venloosche Nar luustert nao de naam Benthe Steeghs. Deese aktieve vastelaovesvierder is opgegreujd op de Horsterwaeg in Bliërick. Op de Titus Brandsma schoël waas ‘t in 2011 prinses. Vervolges ging ‘t nao college Den Hulster om zich heejnao te richte op opleidinge in de richting horeca. In iërste instansie beej Gilde opleidingen en daornao de Hoëgere Hotelschoël in Mestreech. Veur zien studies haet Benthe gewoënd in Berlién, Madrid en Valencia. Inmiddels is Benthe bezig mit ein traineeship bij de ABN AMRO bank.
Vrolijke dame
Benthe woént mit ziene vrind Wino same in Venlo. Op Aswoensdaag krieg ‘t stel de sleutel van eur nieje hoés in Bliërick. Vastelaovend kreeg Benthe, en zien zus Britt, mit de paplaepel binne. Vader Roger waas in 2004 prins van de Wortelepin en mooder Francien is inmiddels 44 jaor lid van diezelfde vereiniging. Nar Benthe helt van gezelligheid en kin neet good stilzitte. Vanaaf zien 7e jaor is ‘t lid van de hockeyclub. Ook helt ‘t van verre reize make. Benthe mak deil oét van de organisasie van ‘t Groët Gala Worteletruuj.
Veurzitter Rob Jacobs: “Dees Nar is ‘nne pure vastelaovesgek en ‘nne echte bourgondiër. Benthe haet altiéd gooje zin en gedijt good beej gezelschap. We hebbe al ein prachtig veurtrajek belaef mit elkaar. Spesjaal veur Benthe hebbe we mit de Thetru oét Venraoj ein niej kostuum ontwikkeld. D’r is zelfs ‘nne spesjale gôlde narre-medalje gemak. We trekke mit Nar Benthe I de hiele gemeinte door om euveral ‘t vastelaovesvirus te verspreide. ‘t Geit ein joeksig en prachtig avontuur waere.”
Foto Peter de Ronde
Laes heej de proklamasie