’t Is Aswoensdaag, de meis laege daag van ’t jaor. We kieke truuk op ’n fantasties seizoen. In november zien we begós mit de aaftrap van De 3-kes radio, ind jannewarie vond de geweldige De 3-kes Narre-Zitting plaats en in fibberwarie de Top 33 van Bliërick en Tegele.

Vervólges makte weej ós op veur de bekindmaking van de nieje Nar. Op zaoterdaag 23 fibberwarie waas ’t zoé vaer. D’n hiér Dylan Schell woort door Marinho Peters van Linke Mik bekindgemak. De mert stond aafgelaaije vol mit minse. D’n boéttoch dae volgde waas aaf. ’t Zunke haet netuurlik gezörg veur de extra gooje dimensie aan De 3-kes Daag.

Nar Dylan I haet iddere daag alles gegaeve en droog ’t Narreschap vanoét zien tiéne oét. Ziene lach is Groët-Venlo doorgegaon. Van Belvend tot Arce haet hae zich laote zeen en huure. ’t Groët Venloos Vastelaoveshudje woort euveral teveurschien gehaold en zörgde veur de juuste sfeer in iddere kroeg en zaal. Zondaag 3 maart woort De 3-kes 16 jaor jongk en prissenteerde zich mit ’n groët aantal leeje, partners en kinder in de Bliërickse optoch.

Veur ’t iérs woort d’r ‘nne eige wage gebouwd. Nar Dylan I stond d’r baove op en haet de minse naeve de kant getrakteerd op ein flinke lading snoep.

De stadsdeiletoer waas de letste daag in ’t Narrepak. In ’t witte hoés woort ’s nach symbolisch aafscheid genaome um vervólges dinsdaagmorge weer beejein te kómme veur ein good boere ontbijt. Weej hebbe eine geweldige daag gehad gister en zien nog ein paar oor mit zien alle op paad gewaes. De harde kern van de club haet Nar Dylan um 24.00 oor de gólde medalje aafgenaome en nog wies de late eurkes mit um gevierd in kefee de Baek.

Weej bedanke idderein dae haet beejgedrage aan dit geweldige Vastelaovesseizoen. ’t Waas aaf! Noow lekker naogenete…