De 18-jeurige Stan Huys oét Venlo is oétgeroope tot de 21e Groët Venloosche Nar. Op ein volle Mert makte börgemeister Antoin Scholten ziene naam bekind. Stan regeert tot Aswoensdag onder ‘t motto ‘Vastelaovend vierse offline’ en is daormei de jongste Nar oeits.
De bekindmaking vond plaats tiédes De 3-kes Parade. In ein stoet mit 23 kollega-vereiniginge en hun hoéghede woort de onbekinde Nar begeleid van City Cinema nao ‘t Stadhuis, wao de hoéghedeparade veur de derde kier woort gehalde. De muzikale umliesting waas in hande van Linke Mik. De Nar bekindmaking op de mert veur ’t stadhoes vind al sinds 2013 plaats.
Stan Huys woort gebaore in Venlo en greujde op in Venlo-Zuid. Hae ging nao basisschoël. De Koperwiek en volgde de sportklas op ‘t Blariacumcollege in Bliërick. In 2025 behaolde hae zien diploma Vestigingsmanager Groëthandel aan Gilde Opleidingen. Onlangs startte hij bij Media Evolution in Reuver als allround medewerker.
Vastelaovend vierse offline
Van jongs af aan viert Stan Vastelaovend. Voetbal is ein groëte passie: hae speulde bij Venloosche Boys en is sinds veurig jaor trainer van ‘t meisjesteam onder 15. Veurig jaor waas Stan Joeks-Spotter beej De 3-kes. “Mien betrokkeheid beej de vereiniging haet mien ambisie um Nar te waere versterk. Ik bin superbliej mit deese kans en kiek oét nao de regeerperiode. Ik roop idderein veural op um fysiek te viere en de tillefoon allein te gebroéke as inspirasiebron um ‘t fees ech te viere.” aldus Stan.
Vice-voorzitter Dennis Detillon van De 3-kes: “Stan veel op door zien entoesiasme en betrokkeheid. Hae bleef auk nao ‘t Joeks-Spotters-trajek aktief binne de vereiniging. Ziene wins um de jongste Nar oeits te waere is noow werkelikheid.”
Stan woent beej zien elders in Venlo-Zuid en haet ein aldere zus, Kim. De kômmende daag trek Nar Stan I door de gemeinte Venlo onder ‘t motto ‘Vastelaovend vierse offline’.
Laes heej de proklamasie. Foto Peter de Ronde.