De 19e Groët Venloosche Nar is de 21-jeurige Sjoerd Dings oët Belfeld. Op ein volle Mert woort hae door gedeputeerde Jasper Kuntzelaers bekindgemak. Deze veurmaolige Joeks-Spotter geit wies Aswoensdaag op paad onder ‘t motto ‘Buig & Juich’.
De nieje nar woort bekindgemak tiédes De 3-kes Parade. Ein niej evenement in de binnestad van Venlo. D’r ware 20 kollega vereiniginge mit hoéghede aanwezig um de onbekinde Nar al paraderend te begeleide vanoét kefee Take Five nao ‘t Stadhuis. Heej vond veur de iërste kier de hoèghede-parade plaats. Alle hoèghede woorte door de band Linke Mik muzikaal in ‘t zunke gezatte. As letste woort de onbekende Nar op ‘t podium gevraog.
Gedeputeerde Jasper Kuntzelaers had de iér um Sjoerd Dings als 19e Groot Venloosche Nar te prissentere. Deese aktieve vastelaovesvierder woort gebaore in Baolder. In ‘t riék van De Kook greujde hae op en ging heej nao bassisschool de Bolleberg. Ziene middelbare schoëltiéd brach hae door op ‘t Valuascollege. Op dit moment volg hae deiltièd de Pabo-opleiding aan de Fontys en werk hae as onderwijsassistent bij IKC De Koperwiek in Venlo.
Buig & Juich
Sjoerd woènt in Belfeld en is heej auk maatschappelijk aktief. Zoè is hae as slaagwerker aktief beej joekskapel Beejein veur de Gein en hermenie Kunst na Arbeid. Ziene ièrste optoch leep hae mit de fanfare in Baolder. Sinds hae in Belfeld woènt, is hae ‘t fees vastelaovend mier en mier gaon waardere. Hae zoel ‘t noow veur gen gôld mier wille misse.
“Ik woort gevraog um beej de joekskapel oèt te helpe. Ik zoog toen pas ech wie moeï dit fees is en de onderlinge verbondeheid. De sfeer is altiéd geweldig. Ik zal d’r mien bes veur doon om dees prachtige tradisie mei in stand te halde”, zaet Sjoerd.
Sjoerd kwaam in 2022 beej De 3-kes in beeld. Hae waas ein van de 10 iërste Joeks-Spotters. “Zien entoesiasme, betrokkeheid en leefde veur ‘t fees woorte opgemerk. Hae bleef auk nog nao ‘t Joeks-Spotters trajek beej ôzze club betrokke. Zoè makte hae bliksemsnel carrière en steit hae noow as Groët Venloosche Nar 2024 te boek”, aldus Rob Jacobs van De 3-kes.
Sjoerd woènt mit zien breurs Tom en Martijn beej zijn vader. Ziene ome is de bekinde aardbeienkweker Marcel Dings dae jaorliks faciliteert det d’r vastelaoveswages gebouwd kinne waere. Sjoerd haet dankzij de Joeks-Spotters zien groëte leefde Alice Nijs liere kinne. Het waas in 2023 auk ‘nne spotter.
De kômmende daag trek Nar Sjoerd I door de gemeinte Venlo onder ‘t motto ‘Buig & Juich?’. D’r is ein spesjaal leed gemak mit Linke Mik en de Aad Prinsen Belvend um ‘t buige en juiche te stimulere. Dit leed is online te vinde en via de kanale van De 3-kes.
Ik, Nar Sjoerd I
Opper-trommelaer van fanfaar wies hermenie
Maarschalk van Baolder wies Belvend
Houwer-op-de-kis beej ‘Beejein veur de Gein’
Spotter van Vastelaovend in Groët-Venlo
Commandeur van neet wiés nao onderwiés
Beschermhier van toekomsbestendige vastelaovestradities
Maar baove al de Groët Venloosche Nar van 2024
Beej de onwiésheid van de Spraeker, de Narre-adjudant, de Regelaer en eur onwiéze gezelschap,
as negetiénde Nar van de gemeinte Venlo in ‘t jaor 2024, gaef te verkinne en te verstaon det:
- Ik idderein wil oproope mei te buige, en nao idder fluitsignaal keihard te juiche.
- De 3 dolle daag noeits verlaore meuge gaon, Laote we d’r juus auk zondaag, maondaag en dinsdaag same staon.
- Meziék is wao weej dees daag op laeve, Loepzuuver of kei vals is noow um ’t aeve.
Onder ’t motto:
Uig dao! Vastelaovend op idders bolle toet.
Geej ziet d’r op oet mèt ein sjtraolende sjnoet.
Maar wae had det gedach, det weej ôg gaon verwinne.
Want mit ôs roeïe fluit dao kump-se mei-j binne.
Mich liek ’t noow ontzettend ruig
As geej allemaol mei doot mit ‘Buig & Juich’