UPDATE: De winnaer van ôs winaksie is bekind. Maurice Peeters, prins van Lomm in 1991, haet de aksie gewonne. Deese persoën meug zich zaoterdaag melde veur ein lekker ontbijt bij restaurant Niej-Jork (Keulse Poort). Heej waere de 2 polsbendjes veur de zoepkoel en 2 De 3-kes mutse euverhandig. Idderein bedank veur ’t mei doon. Van alle inzenders waere 22 liedjes tiédes de oétzending gedreid.
2 Vastelaovesvierders make kans op 2 polsbendjes veur de zoepkoel, ein ontbijt bij restaurant Niej-Jork en ein unieke De 3-kes muts. Steur uuterlik maondaag 24 fibberwarie 2025 dien favo-vastelaoves-liedje in en vertel ôs waorum dit liedje veur dich zoé biezonder is.
Klik heej um ’t formulier in te steure.
Oét alle inzendinge waere 23 liedjes gekaoze die tiédes de oétzending waere gedreid. Netuurlik vertelle we doorbeej auk dien raeje um veur ’t betreffende liedje te kieze Inzenders kinne dus zelf gedeitelik de playlis samestelle.
Boétegewoeëne De 3-kes radio
De organisatse van de boétezitting en De 3-kes slaon tiédes de 34ste edisie weer de hand in elkaar. Zaoterdaag 1 maart wuurt d’r vanaaf 9.00 oor live Boétegewoeëne De 3-kes radio gemak vanoét ôzze mobiele studio. Tössedoor zien d’r interviews en reportages oét de binnenstad te beluustere en d’r zien inkele live optraejes. ’t Is meugelik beej de studio te kômme kieke. Restaurant Niej-Jork is geäöpend. De oétzending däört wies 14.30 oor.
Boétegewoeëne De 3-kes wandeltoch
Ein splinterniej initiatief. Minse kinne ‘nne joeksige toertoch laupe van 11.33 kilomaeter door 3 stadsdeile en langs 5 vastelaoves kunswerke. Laes heej mier euver ’t nieje initiatief.