We verzamelde zaoterdaag 10 mei beej ôs Verdeenstelik lid Maashof veur ôs jaorvergadering en oétstepke. Tiédes de jaorvergadering is aafscheid genaome van Rob Jacobs in zien funksie as veurzitter en Noud Faassen as vice-veurzitter. Beide manne hebbe 8 jaor dees funksies vervuld. Zeej hebbe beslaote um zich te blieve inzette veur ôs club, maar neet mier as bestuursleeje. Rob is in jannewarie 2012 lid gewaore en is vreejwaal metein bestuurslid gewaore. Weej meuge um dus bedanke veur 13 jaor lid van ’t bestuur. Noud is in september 2014 lid gewaore en is veural mit de radio en website aan de slaag gegaon. Det blief hae auk doon in de toekoms.
Veur al eure inzet kreege zeej ein prachtige portret teikening. Doornaeve hebbe zeej veur alle eure maatschappelikke inzet (auk veur andere clubs) de gôlde ‘3-werf alaaf’ speld ontvange. Ein ziér biezondere onderscheiding die pas twië kier ierder is oétgereik door stichting ‘Laeve de 3!‘. Manne, diék verdeend. En weej zien bliej det geej ôg blief inzette veur ôzze club. De vreej gekômme funksies waere ingevuld door Sander Mattheijssen en Dennis Detillon.
Tiédes de vergadering zien de aspirant lidmaotschappe van Alice Nijs en Sjoerd Dings umgezatte. We zien d’r trots op det dees jonge vastelaovesvierders zich inzette veur ôs club.
Nao dees biezondere jaorvergadering zien we op de fiets gestap veur ein gezellig oétstepke. We zien gaon scherme in Venlo-Noord en hebbe ein rondleiding gehad door stadion de Koel.
Vervôlges zien we gaon naopraote mit ein hepke en klepke d’r beej. ’t Waas eine knoép gezellige daag.